Abebaw Desalegn commented

2024-05-25 19:00:02

ዕሙ ከጠፋች ሁለተኛ ቀኑን ያዘ ። እንደቀልድ ደብዛዋ ጠፋ ። ብንፈልግ ብናስፈልግ አየናት የሚል ጠፋ ። በአጋጣሚ መንገድ ላይ ከኦክሲ ጋር ስንገናኝ ፈገግ ትልልኛለች ። ፈገግታዋን ሲያይ ልቤ ጥፍት ይልላት ጀመር ። እንደው አንድ ቀን ሰው በሌለበት ባገኘሗት እል ጀመር ። ምን እንደነካኝ እንጃ ሁለመናዬ ኦክሲን ኦክሲን ይለኛል ። ስለሷ ሳስብ ልቤ አከባቢ ይነዝረኛል ። የኔ ውድ ኦክሲ የደም ዝውውሬን ሁላ ተቆጣጥራዋለች ። የምር ይሔን ያልኩት እኔ ነኝ !? ምን ሆኜ ነው ግን ? የንጉሥ ሚስትን መመኘት ታላቅ ድፍረት ቢሆንም እኔ ግን ከመመኘት አልፎ ለመቃመስ አቀድኩ ። ይሔ ደግሞ በራስ ላይ ሞት እንደመፍረድ ነው ። ከተጋደምኩበት እንደምንም እየተንጠራራሁ ተነሳሁ ። ቀኑን ሙሉ በማላውቀው ምክንያት ደብሮኝ ተኝቼ ነው የዋልኩት። ጫማዬን ተጫምቼ ወደ በሩ አመራሁ። እየመሸ ስለነበር ድንግዝግዝ ያለ ብርሀን ነው የሚታየኝ ። በሩን ከፍቼ ወጣሁ ። ቤተ መንግስቱ ያለወትሮው ፀጥታ ሰፍኖታል ። ሽርጉድ የሚያበዙትን ሰራተኞችን እንኳን ዛሬ ላያቸው አልቻልኹም ። ድንገት ከኮሪደሩ ጫፍ ላይ የሆነ ሰው ብቅ አለ። ከርቀት መለየት የቻልኩት ነጭ ልብስ እንደለበሰ ብቻ ነው ። ትንሽ ቆይቶ ያው ሰው ቀኝ እጁን አንስቶ አውለበለበልኝ ። የሰውዬውን አቅጣጫ ተከትዬ መራመድ ጀመርኩ ። ወደሰውዬው እየቀረብኩ ስመጣ ቀሚስ የለበሰች ሴት መሆኗን እየለየሁ መጣሁ። አዎን ኦክሲ ናት ። የኔ ኦክሲ ፊቷ ላይ የሆነ ነገር እንዳማራት ይናገራል ። ደሞ ያንን ፈገግታዋን አብርታዋለች ። ቀስ እያልኩ ወዳለችበት ተጠጋሁ ። ድንግዝግዝ ባለው ብርሀንም ቢሆን ውበቷን ለማስተዋል አይከብድም ። አጠገቧ ልደርስ ስል እጥፍ አለችና ከዓይኔ ተሰወረች ። ምንድነው ጉዱ ? በህልሜ ነው እንዴ !? ህልም ከሆነ እንድነቃ በማሰብ ሀሳቤን ሰብስቤ ትኩረቴን ንቃት ላይ አደረኩ ። ግን ምንም የተፈጠረ ነገር የለም ። ያለወትሮው የቤተ መንግስቱ መብራት አለመብራቱ እንግዳ ስሜት ፈጠረብኝ ። በቁም እየቃዠሁ ነው ? ተራመድኩና ኦክሲ ወደታጠፈችበት አቅጣጫ ተመለከትኩ ። መታጠፊያው አጠገብ ግድግዳውን ታካ ቆማለች ። የምሽቱ ንፋስ ፀጉሯን እያዘናፈለ ያጫውተው ጀምሯል ። ከንፈሯን በምላሷ እያረጠበች በስስት ተመለከተችኝ ።